Ons wil jou graag verwelkom en glo dat jy die onderlinge kameraadskap, harmonie, vriendskap, hulpvaardigheid en gemeenskaplikheid saam met ons sal ervaar.

By ons tak sien ons nie slegs om na die reёl van sosiale byeenkomste nie (alhoewel ons probeer om mekaar gereeld te sien en lekker saam te kuier), maar waak voortdurend oor die welsyn van ons lede. Daarom ondersteun ons die lede van die tak wanneer hulle in die algemeen hulp nodig het, en verskaf ook hulp waar pensioen- en mediese voordele ter sprake is. Ons bou en onderhou gevolglik goeie verhoudinge met instansies wat ons kan help om ons lede te ondersteun. Die tak is, as voorbeeld, dankbaar vir sy verhouding met die Bejaardesorgfonds vir Afgetrede Polisiebeamptes (“Elderly Care Fund for Retired Police Officials”, sien www.bsfonds-ecfund.co.za).

Die tak, met behoorlike inagneming van sy relatiewe onafhanklikheid soos beskryf in artikel 10.8.3 van die Bond se Grondwet, onderneem ook om belange wat deur die Hoofbestuur van die Bond geïdentifiseer word, te ondersoek met die oog op die moontlike bevordering daarvan.

Die grondslag van die interne verhoudinge in ons tak is een van onderlinge vertroue. Die woord ‘fiducia’ (uit Latyn) beteken ‘vertroue’. Ons koppel dus hierdie onderlinge vertroue ten nouste aan die fidusiêre verpligting wat op die lede se verkose Takbestuur geplaas word. Elke lid van die Takbestuur is ‘n fidusiêr, ‘n trustee wat namens die lede van die tak optree in die belang van die lede, eerder as vir eie gewin. Dit is ‘n vennootskap van wedersydse vertroue.

Lekker lees!

(En moet asseblief nie huiwer om bydraes in te stuur na enige van die Takbestuurslede nie …)